T1 10月31日 星期二
十月嘅過去......十一月嘅來臨......可惜冬天不回來! 其實我已經一早做足防寒準備,上星期花費一千幾百去換冬季新裝,可惜到今日都仲未可以著出街......一大早起身就見到個太陽set行晒咁,單單只用對未瞓醒嘅眼睇,就已經feel到今日又係熱爆,新聞好似今年十月打破香港百年來最熱嘅十月平均溫度,我就唔希望連十一月都打破埋呀~
後記: 如果有個唔討厭我嘅女仔咬我隻手臂一下,仲要好大力,咁即係代表咩?

重九 10月30日 星期一
重陽節快樂......??? 點解重陽節要快樂呢? 已經唔知道喇,因為香港太多中西節日,每個節日都祝人快樂,咁樣就連重陽節都唔爭在啦! 重陽節當然要登高啦,其實出外都一樣咁有意思,星期日我同C兄肥仔就選擇北上,當然係正經啦......(從來無人信過我)...... 吃喝玩樂通通都有,不知玩得幾咁高興呀,簡直係100%充電完成,玩得太累加上時候唔早,寫得比較簡短,見諒~
後記: 您等得越久，就越不可能放棄；陷得越深，似乎越難以自拔。

和暖 10月28日 星期六
假期又再次開始喇,不過現排又變得上心工作,因為美國單job真係幾吸引...要思考...要想像...要細心...要觀察...要努力,可能我真係要注定食呢一行飯喇! 工作還要工作,玩樂點都要花時間落去,廿幾歲人唔玩邊有可能呢? 搵真銀固然好重要,但係享受人生同樣重要,想從中取得一個平衡實在艱難,工作上就算遇到幾大嘅困難都好,一放工就可以將問題通通拋開,但係當我玩嘅時候總係...總係突然之間會諗起公事,就好似今日我去尖沙咀買嘢咁,之前已經買左一條牛仔褲同一對cons鞋,之後再去買風褸同襯衫,每次買完之後總會諗起公事,完全忘記唔到~
後記: A happy heart comes first, then the happy face. (心境快活，自然笑容滿面。)

大致天晴 10月27日 星期五
當人類仲未進化嘅時候,即係大約响北京猿人時期左右,這些"人類"已經充分咁享受緊自由,佢地完全係一絲不掛,每日過著自由自在嘅生活,無其他人可以控制佢地,而佢地又唔會去控制他人,或者只係腦筋未發達啦......到人類建立文明之後,每一個人嘅自由慢慢咁失去,因為人人都要負責任同埋守法,做好事有佢嘅自由,唔會有人出面反對; 相反,做壞事就沒有自由,直頭係嚴禁......我雖然並唔喜歡安於現狀,工作上已經失去大部份嘅自由創作,金錢上只可作出有限度嘅自由分配,生活上唯一可以享受自由就只得放工或假期,但係我喜歡現有嘅自由,最起碼我有思想嘅自由~
後記: 在您所在的地方做點善事吧；每人一點行善積起來，可以驚天動地。

煙霞 10月26日 星期四
何謂商業秘密呢? 一間公司正進行一項商業活動,而公司老闆並唔希望市場上出現同類型嘅活動,為求獨佔市場嘅頭啖湯,所以往往需要下屬保守呢個秘密......我公司接左一單好奇怪嘅job,並唔屬於香港嘅工程,而係美國,雖然唔係第一單美國job,但係今次有些少分別,就係要保守呢個商業秘密喇! 原來合約一早定明,工程一日未暴光一日都唔可以透露相關嘅消息,包括所以傳真信件同電郵,一律通通都唔可以透露半句,起初我覺得幾有趣,不過慢慢就會發覺失去一點嘅自由~
後記: The practice of art isn't to makea living. It's to make your soul grow. (從事藝術不是為了謀生，而是為了修身養性。)

轉涼 10月25日 星期三
今個月就快完結喇,應該係話今年......每日就係咁樣過,咁就過左一年喇(就快啫),尋晚六合彩頭獎兩注中,每注派三千幾萬,可惜又係無我份,廿蚊嘅希望留返下一次吧! 今晚繼續收睇TVB嘅"高朋滿坐",主題係"無情情創業",香港人太過缺乏同家人溝通,所以我非常鍾意睇呢個節目,我好鍾意戲裡面嘅高家,太開心喇,家人與家之間都能夠有講有笑,最重要就係只要家人出事時,全家上上下下都會撐到底......今集大口喱被賤人所騙頂一間鋪位,她就立即辭職開始創業之路,經過全家人嘅幫助下,大口喱終於都成功做到自己喜歡做嘅工作......現實生活中嘅我只能夠孤身走我路~
後記: I've come to learn that the best time to debate family members is when they have food in their mouths. (我發覺，和家人辯論，最好是趁他們滿嘴食物。)

濕熱 10月24日 星期二
兩日前即係星期日,我上Yahoo拍賣會睇中一個袋,我覺得好有型,加上價錢合理,所以忍唔往手打電話比個賣家,我先問一問佢有無貨,佢話我好好彩仲淨返last一個......(六合彩又唔見我中!) 咁我立即決定星期一夜晚交貨收錢......先講下個袋,並唔算係出晒名嘅名牌,係英國嘅"Fred Perry"唔知有無人識喇,呢個係一個大size帆布軍袋,全黑色,斜揹側揹手挽三用袋,加上周圍都織有黑真皮邊,我簡直愛上它......今日係第一日用呢個新袋,睇落去好唔慣咁,就好似自己明明係長頭髮,突然之間變光頭咁樣,或者太過"潮"嘅物品唔係太適合平凡嘅我啦~
後記: If grass can grow through cement, love can find you at every time in your life. (小草能穿過水泥成長，愛也能在您生命中任何一個階段出現。)

霜降 10月23日 星期一
好奇怪,大家留意一下今日竟然係"霜降"(農曆廿四節氣之一),我覺得而家身處於菲律賓咁,今日嘅最高氣溫成廿八度有多,何來"霜降"呢? 農曆節氣响中國已經有數千年歷史,本人絕對無質疑過,有咁大嘅差異應該在於環境轉變,人人都話污染有幾咁嚴重,而家有目共睹啦......今年嘅夏天其實已經過去喇,中秋都過左啦,係咪! 可惜秋高氣爽還遲遲未到,香港遲早會變成菲律賓喇~
後記: Don't judge a book by its cover'til you've read the book. (別憑封面判斷書的好壞，讀過了再說吧。)

勁熱 10月22日 星期日
一得閒(多數星期六深夜)我就會去Yahoo嘅拍賣會度see see,咩都睇下咁啦,由於拍賣會實在實在太多嘢喇,加加埋埋成幾萬件貨品,睇極都睇唔完呀,所以我每次都只會揀一種貨品嚟睇,好似尋晚就揀名牌袋,雖然絕大部分都係女性手袋同銀包,不過有時轉下角度,欣賞一下女性世界嘅事物,我覺得比平時街上睇多好多嘢,以前行街都會留意一下手袋同銀包,後來上網睇更多袋之後,眼界真係大開左好多,原來某某牌子出過一個咁嘅款式嘅袋,只有响外國先至買得到嘅銀包等等,呢D我以前從來都未見過,而家click一click Yahoo嘅拍賣會,就可以盡收眼底喇~
後記: I still believe that love is all you need. I don't know a better message than that. (我依然相信：您需要的只有愛。據我所知，世上沒有比這更好的金玉良言。)

光天化日 10月21日 星期六
自從尖沙咀海濱長廊美化工程完結之後,我一直都搵唔到機會去尖沙咀,無他嘅好人好姐做咩事要走去海旁呢,貪海邊嘅西北風零舍不同(國語)咩......而且好似我呢種咁嘅單身寡佬又點去呢,話時話以前有拖拍嘅時候都無去過...真係可惜! 皇天不負有心人,今日終於都比我等到一個千載難逢嘅機會喇,雖然只係幫手送幾份圖紙去,不過都能夠一嘗心願喇! 尖沙咀可以算叫做完工,文化中心一帶都已經完完全全咁解封,遊客好多好多好多好多,我越來越喜歡香港呢個地方~
後記: 虛擬世界容易令人興奮和上癮，青少年心智未成熟，長期沉迷，會將虛擬世界延續至現實世界，漸漸不善於多元化思考。